Nk'uko biteganyijwe kuwa gatandatu wa nyuma w'ukwezi, kuri uyu wa 26 Ukwakira 2024 mu Karere hose habaye Umuganda rusange w'ukwezi k'Uwakira 2024. Ku rwego rw'Akarere ka Gisagara wabereye mu Murenge wa Muganza mu Kagari ka Remera aho abaturage n'abayobozi bateye ibiti bivangwa n'imyaka 10,000 ku buso bwa 100Ha.

Umuganda witabiriwe na MoS MINEDUC akaba n'imboni y'Akarere Claudette IRERE n'Itsinda ry'abadepite mu Nteko Ishinga Amategeko y'u Rwanda (ku munsi wa 3 mu Karere kacu) riyobowe na Honorable NTEZIMANA Jean Claude ari kumwe na Honorable Vanessa Umuhoza Gashumba na Honorable Tumusime Francine, Umuyobozi w'Akarere ari kumwe na VM AFSO, Country Director wa DUHAMIC ADRI, abayobozi b'inzego z'Umutekano ku Karere, abakozi b'Akarere, Umurenge n'Utugari n'abaturage basaga 2000.

Ingemwe z'ibiti zateguwe ku bufatanye na DUHAMIC ADRI binyuze mu mushinga Climate Justice Communities Project "CJC Project". Hatewe ibiti 10,000 ariko abaturage banahawe ibiti 2500 by'imbuto ziribwa (maracuja) byo gutera iwabo.

Nyuma y'umuganda hakurikiyeho inama yahuje abayobozi bitabiriye uyu Muganda  n'abaturage, aho State Minister muri MINEDUC Honorable IRERE Claudette yasabye abitabiriye bose kurushaho kubungabunga ibiti byatewe n'Ibudukikije muri rusange no kubyongera aho bari hose. Yasabye ababyeyi kwita ku bana babo bagakurikirana imyigire yabo, kandi abizeza ko abari hafi nk'imboni koko y'Akarere ka Gisagara.

Mu biganiro n'abadepite, hakemuwe ibibazo by'abaturage, ndetse banatanga ibitekerezo ku bibazo bibangamiye n'ibyifuzo byatuma iterambere bifuza ryihuta kurushaho.

Visi Meya Jean Paul Habineza we yakoreye umuganda rusange mu Murenge wa Kibilizi, aho yafatanyije n'abaturage bo mu Kagari ka Muyira n'Urubyiruko rwaturutse muri Green Rising ambassadors ndetse n'Abaturutse muri Minisiteri y'Urubyiruko n'Iterambere ry'ubuhanzi mu gikorwa cyo gutera ibiti.

Muri rusange, mu Karere hose ibikorwa byibanze ku bikorwa bikurikira:
- Gutera ibiti bivangwa n'imyaka
- Gutera ibiti by'amashyamba
- Gusibura imirwanyasuri n'inzira z'amazi
- Guharura imihanda
- Kubakira abatishoboye
- ....

Murakoze