Minisitiri w’Urubyiruko n’Umuco Mbabazi Rose Mary ysuye Akarere ka Gisagara, atangiza ku rwego rw’igihugu ibikorwa bya koperative z’urubyiruko zitunganya imihanda, anasuba bimwe mu bikorwa biteza imbere urubyiruko mu Karere ka Gisagara.

Igikorwa cyo gutangiza ku mugaragaro ibikorwa bya koperative z’Urubyuruko rutunganya imihanda ku rwego rw'igihugu cyatangirijwe mu Murenge wa Ndora kuri uyu wa gatanu tariki ya 11 Gashyantare 2022 gitangizwa na Minisitiri w'Urubyiruko n'Umuco Rose Mary Mbabazi ari kumwe na CO BDF ku rwego rw'igihugu Vincent Munyeshyaka.

Bakiriwe n’Umuyobozi w’Akarere wungirije ushinzwe iterambere ry’ubukungu Jean Paul Habineza ari kumwe n'abayobozi b'inzegonz'umutekano, bamwe mu bakozi b'Akarere n'urubyiruko ruri muri koperative ishinzwe imihanda mu Murenge wa Ndora na bamwe mu rubyiruko rwo muri uwo Murenge.

Bakoranye umuganda n'urubyiruko, bashyira laterite mu muhanda wa Ndora-Musha ahangijwe n'umuvu w'amazi bakanatsindagira n'imashini za bugenewe (compactor).

▪️Mu kiganiro yagiranye n'urubyiruko nyuma y'umuganda, yashimiye cyane Akarere ka Gisagara uburyo bakora cyane, bigaragaza ubuyobozi bwiza. Nyuma yo kumva ubuhamya n'imigambi y'urubyiruko, yarushimye cyane, arusaba kudapfusha ubusa amahirwe bahabwa, ahubwo bakore cyane biteze imbere kandi batange akazi no ku rundi rubyiruko.

Mu Karere hari Koperative 7 z'urubyiruko zikora imihanda zatanze akazi ku rubyiruko 346.

▪️Minisitiri Rose Mary Mbabazi yasuye bimwe mu bikorwa biteza imbere urubyiruko:

- Inzu mpuzamikino y'Akarere (Gymnase), asobanurwa imikino 6 inyuranye ihabera, ashima ubunini n'imyubakire yayo.

Yarebye ibindi bibuga Bihari (umupira w’amaguru, beach volley, gym tonic), arishima, yemera kuzakora ubuvugizi tribune y'ikibuga cy'umupira w'amaguru igasakarwa kandi ko amakipe y'i Kigali azajya aza gukora umwiherero ku Gisagara.

- Yasuye kandi ibikorwa by'urubyiruko binyuranye bikorerwa muri YEGO Center arabishima cyane: Showroom, Urubyiruko rwiga gukora inkweto, kudoda imyenda na Service y'ubuzima itangirwa mu kigo cy'urubyiruko.

- Agakiriro ka Rwanza kahurijwemo urubyiruko mu bukorkori bunyuranye, birebera ibikorwa bya Cooperatives z'Urubyiruko, barashima cyane: ANECO (idoda imyenda n'Inkweto ), AMBARA NEZA (icuruza imyenda), COMESA (ababaji).

Umushyitsi Mukuru yahaye urubyiruko inama zitandukanye harimo kugira umurava mu byo bakora, guhanga udushya, kwaguka mu mitekerereze, kwizigama no gukorana n'ibigo by'imari n'ibindi bizabafasha kwiteza imbere.