Kuri uyu wa gatanu tariki ya 22 Kanama 2025, Mu Karere ka Gisagara hateranye Inama Mpuzabikorwa y'Akarere (2025-2026) ihuza abayobozi b'Akarere, Abahagarariye Inama Njyanama y'Akarere, inzego z'umutekano, Abakozi kuva ku Karere kugera ku Kagari, Abakuru b'Imidugudu n'abayobozi b'ibigo bitandukanye bikorera mu Karere.

Inama yitabiriwe by'umwihariko na Guverineri w'Intara y'Amajyepfo Kayitesi Alice ari kumwe n'abayobozi b'inzego z'umutekano ku rwego rw'Intara.

Umuyobozi w'Akarere, mu gutanga ikaze, yasabye abitabiriye kwaguka bagatanga ibitekerezo no gufata ingamba zihutisha iterambere ry'umuturage.

Umuyobozi w'ingabo mu Ntara Maj. Gen. Gatama Vincent yabasabye gushyira imbaraga mu iterambere n'imibereho myiza y'abaturage kuko ni rwo rugamba twese duhuriyeho kuko ari abayobozi ku rwego rw'igihugu, ingabo na police ubu twese ni ho duhanze amaso, ni cyo kituraje ishinga.

Umuyobozi wa Police mu Ntara yabasabye kwita ku mutekano w'abaturage n'ibyabo kuko bituma umuturage akora atekanye, bityo agatera imbere koko.

Guveriniri w'Intara y'Amajyepfo wari umushyitsi mukuru yashimiye ubuyobozi bw'Akarere uburyo inama yareguwe ikanitabirwa, kandi by'umwihariko imiyoborere myiza igaragara mu Karere n'ubwo hakiri byo kunoza.

Yabibukije batagomba kwibwira ko bageze aho bagomba kugera, kuko gahunda ya Leta ni Umuturage kw'isonga, umunyarwanda agomba gutera imbere kandi akabaho neza. Umuturage rero ni ishusho y'Umuyobozi.

Inama yashojwe no gusinya Imihigo 2025-2026, gushimira Imidugudu 2 muri buri Murenge yitwaye neza kurusha iyindi, guhemba Utugari 3 twahize utundi aho bahawe ibikombe: Sabusaro (Kansi), Gikonko (Gikonko), Cyimana (Musha) no guhemba Imirenge 3 yabaye iya mbere mu mihigo y'umwaka 2025-2026 bahabwa ibikombe, Umurenge wa Ndora ukaba waje ku ruhembe: 1è Ndora, 2è Gikonko, 3è Nyanza.
 

Murakoze