Ikipe y’Akarere ka Gisagara y’abafite ubumuga ya Sitting Volleyball yashyikirijwe ibendera ry’igihugu, ikaba igiye mu gihugu cya Misiri guhagararira u Rwanda mu mikino nyafurika y’amakipe yabaye aya mbere iwayo.

Ni umuhango wabereye kuri Montana Hotel ku Gisagara ku mugoroba wo kuwa 25/02/2024, uyoborwa n’Umuyobozi w’Akarere Jerome Rutaburingoga, ari we wari umushyitsi mukuru. Ikipe irahaguruka ku Gisagara muri iki gitondo cyo kuwa 26/02/2024 yerekeza Kigali, aho nimugoroba bahaguruka ku kibuga cy'indege i Kanombe berekeza mu Misiri.

Twakwibuka ko ikipe y’Akarere ya Gisagara Volleyball Club nayo iheruka guhagararira u Rwanda mu mikino nk’iyo muri Volleyball yabereye muri Tuniziya mu kwezi kwa Gicurasi 2022 ikegukana umwanya wa 3 muri Afurika, igahesha ishema igihugu cyacu, dore ko bwari ubwa mbere bibaye mu mateka y’u Rwanda.