Komite Nyobozi y'Akarere ka Gisagara yashoje manda

Ku gicamunsi cyo kuri uyu wa 30 Ukwakira, mu Karere ka Gisagara habaye umuhango w'ihererekanyabubasha hagati y'Abagize Komite Nyobozi y'Akarere bashoje inshingano zabo n'Umunyamabanga Nshingwabikorwa w'Akarere, Madamu Carine Uwamahoro, uzakomeza kuyobora Akarere mu buryo bw'agateganyo, mu gihe hategerejwe ko haboneka indi Komite Nyobozi nshya y'Akarere.

Nk'uko biteganywa n'amategeko y'imiyoborere y'inzego z'ibanze zegerejwe abaturage, Komite Nyobozi y'Akarere, kimwe n'Inama Njyanama y'Akarere bagira manda y'imyaka 5. Abari bari ku buyobozi batowe mu mwaka wa 2021, bakaba bari bamaze imyaka 5 iteganywa n'itegeko. Itegeko riteganya ko iyo bahagaritse inshingano ku bwo kwitegura amatora, Akarere kayoborwa by'agateganyo n'Umunyamabanga Nshingwabikorwa w'Akarere, kugeza abatowe bashya bamaze kurahira.

Kuri uyu wa gatanu tariki ya 30 Ukwakira 2026 ni bwo habaye ihererekanyabubasha hagati ya Komite Nyobozi icyuye igihe n'Umunyamabanga Nshingwabikorwa w'Akarere nk'ugiye kuyobora Akarere by'agateganyo. Ni igikorwa cyitabiriwe n'abagize Inama Njyanama y'Akarere, nabo bashoje manda, abayobozi b'inzego z'Umutekano, abakozi b'Akarere bakorera ku Karere, Abanyamabanga Nshingwabikorwa b'Imirenge n'Abanyamabanga Nshingwabikorwa b'Utugari, JADF, PSF, DG b'Ibitaro bya Kibilizi na Gakoma, n'Abahagarariye amadini n'amatorero.

Umuyobozi w'Akarere ucyuye igihe, Jerome Rutaburingoga yasinye inyandiko y'ihererekanyabubasha n'Umunyamabanga Nshingwabikorwa w'Akarere, Carine Uwamahoro, anamuha ibendera, kashe y'Akarere n'imfunguzo z'ibiro.

Twakwibutsa ko Jerome Rutaburingoga yari amaze imyaka 10 ayoboye Akarere ka Gisagara.

MURAKOZE