Minisitiri w’ubutegetsi bw’Igihugu, Francis Kaboneka, kuri iki Cyumweru nibwo yashoje umwiherero w’abayobozi mu nzego z’ibanze, abasaba ko ubumenyi bawukuyemo babukoresha mu guha serivisi nziza abaturage no gufatanya nabo muri gahunda z’iterambere.

Uyu mwiherero w’iminsi 5 (26-30/09/2018) waberaga mu Kigo cya Gisirikare cya Gabiro mu Karere ka Gatsibo, uhurije hamwe abayobozi b’inzego z’ibanze guhera kuri ba Guverineri b’Intara kugeza ku bayobozi bashinzwe imirimo rusange mu turere.

Minisitiri Kaboneka yasabye kwita kumicungire y’umutungo wa Leta, ati “dufite ingengo y’imari ntoya ibikorwa byinshi, ariko iyo ngengo y’imari twayikoresheje neza tukayikurikirana, yadukorera ibintu byinshi.”

Yanasabye aba bayobozi kwizera abaturage bakabagisha inama.

Ati “Twizere abaturage, tubahe agaciro kandi tubagishe inama. Ikindi n’ababwira uriya muturage niwe mutungo ukomeye u Rwanda rufite kuko twabizeye, tukajya inama nabo, tukabagisha inama hari byinshi dutangaho amafaranga twafatanya nabo gukora nko kubaka amashuri, imihanda n’ibindi.”

 

Imyanzuro yafashwe nyuma yo kuganira no kungurana ibitekerezo:

1. Kugira igenamigambi n’ingengo y’imari buri mwaka ishingiye ku buringanire no kuyisobanurira abandi bafatanyabikorwa.

2. Kurushaho kongerera ubushobozi inzego z’ibanze no kurushaho gukora ubukangurambaga mu gusobanura neza ingengo y’imari, bigakorwa ku rwego rw’Intara n’uturere hagamijwe gukora igenamigambi ritagira uwo riheza.

3. Kumenya imishinga yose yadindiye hagashakwa uburyo yabyazwa umusaruro mu nyungu z’umuturage.

4. Gusobanura no guha umwanya abafatanyabikorwa, abikorera bakerekwa uruhare rwabo mu iterambere rishingiye ku mahirwe aboneka mu karere kandi bigakorwa buri mwaka.

5. Kwisesengura no gusesengura akarere, imikorere y’abakozi b’uturere, hakagaragazwa ubushobozi bukenewe, imbaraga bafite, ibibazo bafite n’icyakorwa ngo bikemuke hifashishijwe amakuru nyayo kandi y’ukuri.

6. Gutegura amahugurwa y’abakozi cyane cyane abashya binjiye mu kazi mu rwego rwo kubongerera ubushobozi, hagakoreshwa uburyo buhari nk’amashuri n’ibindi.

7. Kwegera no kwicarana n’abavuga rikumvikana kugira ngo habeho ubufatanye kuva mu igenamigambi kugera mu isuzumabikorwa bikajya bikorwa buri mwaka.

8. Kurushaho kwegera abaturage no kubasobanurira ko ibikorwa byose basabwa kubigiramo uruhare kandi ko bitaramba batabigizemo uruhare rugaragara, bigahera ku midugudu batuyemo bikazakorwa hifashishijwe inteko z’abaturage.

9. Gushyiraho uburyo bwo gushaka amakuru, kuyahuza no kuvugurura ubuhari kugira ngo bifashe mu ifatwa ry’ibyemezo mu igenabikorwa ry’akarere no gukemura ibibazo bihari bibangamiye iterambere ry’abaturage.

10. Guhindura uburyo bw’imikorere twongera imbaraga mu kuzuzanya, gukorera hamwe, kugirirana icyizere, kubahana no gukorera mu mucyo, himakazwa indangagaciro no guhanahana amakuru.

11. Gusesengura ibibazo mu buryo bwimbitse no kubiha umurongo kugira ngo haboneke ibisubizo by’ibibazo bibangamiye abaturage mu buryo burambye.

12. Kugira uruhare rutaziguye mu igenamigambi rya buri mwaka no guha umwanya abakozi ba buri shami n’abakozi b’imirenge kugera ku mudugudu mu gutanga ibitekerezo.

13. Guha inshingano abakozi no kubaba hafi mu gihe bazishyira mu bikorwa no gukurikirana mu mikorere yabo.

14. Uturere twiyemeje kurandura ibibazo byugarije imibereho myiza y’abaturage bikigaragara hakoreshejwe ubushobozi buhari.

15. Gukora no kunoza gahunda y’imbonezamikurire y’abana

16. Kunoza uburyo bw’itoranywa ry’umukozi w’indashyikirwa rikorwa no guhuza itegeko rigena uburyo bwo guhemba abakozi b’Indashyikirwa.

Share Button

 

Tanga igitekerezo cyawe

Adding an entry to the guestbook

No entries

Nothing found in the guestbook.